វិធីបំបាត់អាការត្អើក

នេះជាការដកស្រងចេញពី ទស្សនាវដ្តីតារា ដែលបានបង្ហាញពីជំរើសមួយចំនួនសំរាប់ ជា​ដំណោះស្រាយបំបាត់អាការត្អើក ។

អាការត្អើកបណ្តាលមកពីការរួញខ្លួន ការកន្រ្តាក់ខ្លួន នៃសាច់ដុំបរិវេណសន្ទះទ្រូង នៅ ពេលត្រូវដកដង្ហើមចេញ ដំណាលគ្នានឹងសាច់ដុំកន្រ្តាក់ ទើបមានអាកការត្អើក​ ។ អាការបែបនេះ ជាអាការត្អើកស្រាលប៉ុណ្ណោះអាចបំបាត់បាន ដោយការទទួលទានទឹក ១កែវធំ ឬទ្រឹង អត់ដង្ហើមមួយសន្ទុះ ។ ប៉ុន្តែ បើត្អើកជាប់គ្នាច្រើនថ្ងៃ បាត់ត្អើក ហើយក៏បែរជាត្អើកវិញទៀត អាចបណ្តាលមកពីអាការប្រើប្រាស់ថ្នាំមួយចំនួន ភាពតានតឹង ឬដោយសារជំងឺផ្លូវអាហារ ។ បើត្អើកខ្លាំងដល់ថ្នាក់នេះ ត្រូវអាស្រ័យជំនួយពីគ្រូពេទ្យទើបាន ។

ទោះយ៉ាងណា អ្នកអាចបំបាត់អាការត្អើកដោយខ្លួនឯងបាន ដោយ ÷

-ក្រេបរសជាតិជូរខ្លាំង ដូចជា ទឹកខ្មេះ ទឹកក្រូចឆ្មារស្រស់ មិនបាច់ដាក់ស្ករ ។ ភាពជូរនឹង ធ្វើឲ្យសាច់ដុំលែងរួញខ្លួន នឹងធ្វើអោយបាត់ត្អើកបាន ។

-លេបដុំបាយ ដោយពូតបាយជាដុំ ចាប់ញាត់ក្នុងមាត់ រួចលេបចូលតែម្តង់ មិនបាច់ទំពា ហើយដកដង្ហើមអោយបានវែងៗ អោយបាយធ្លាក់ចូលជាសន្សឹមៗទៅក្នុងក្រពះ ។

-ទទួលទានទឹក ១កែវធំ លើកម្តងអោយអស់ពីកែវ ។

-លេបស្ករសចូលពោះ បើបានស្ករអំពៅក្រហមៗ ឬស្ករត្នោតរឹតតែប្រសើរ ព្រោះនឹង បានទទួលគុណតំលៃនៃជាតិស្ករពិត ថែមទាំងមិនបារម្ភអំពីសារធាតុធ្វើឲ្យសផង ។

-ដកដង្ហើមចូលឲ្យបានវែង រួចទ្រឹងបន្តិច សឹមបញ្ចេញខ្យល់ដង្ហើមមកវិញ ឆ្លាស់គ្នានឹង ការទទួលទានទឹកស្អាតអោយបានច្រើនក្អឹក ។

-លៀនអណ្តាតចេញមកក្រៅ រួចយកម្រាមដៃទាញខ្លាំងៗ ។ វិធីនេះនឹងជួយដល់ការ បើកបិទរបស់បំពង់ខ្យល់ ធ្វើអោយខ្យល់ចូលទៅពេញលេញ ៕