ទឹកឃ្មុំ ផ្តល់អត្ថប្រយោជន៍ យ៉ាងច្រើន ចំពោះសុខភាព

សរសេរដោយ ភ្នំពេញដេលីញូវ
ច័ន្ទ, 23 សីហា 2010

ទឹកឃ្មុំសុទ្ធ មានជាតិស្ករ ដិកថូស និង ហ្វ្រាក់ថូស ដែលមានគុណប្រយោជន៍ ខាងអាហារ និង មានគុណសម្បត្តិ ជាឱសថខ្ពស់ ។ ម៉្យាងទៀតវាសម្បូរ ទៅដោយ វីតាមីន B1 វីតាមីន B2 វីតាមីន E វីតាមីន K វីតាមីន C ពីធម្មជាតិ អាស៊ីដអាមីណូ អាស៊ីដ ខ្លាញ់ អំបិលរ៉ែ ស័ង្កសី និង ទង់ដែង ។ បើយើងយកទៅផ្សំ ជាមួយឱសថបុរាណ ក៏ក្លាយជាថ្នាំ ដែលប្រទេសជាច្រើន និយមប្រើ ។

នៅក្នុងក្បួនតម្រាចិន បានកត់ត្រាអំពី ប្រសិទ្ធភាពរបស់ ទឹកឃ្មុំ ថាអាចបណ្តេញកម្តៅ ជំនួយក្រពះ អាហារ ផាល បណ្តេញជាតិពុល ព្យាបាលដំបៅ ធ្វើឱ្យមានសំណើម កាត់បន្ថយភាពស្ងួត និង បំបាត់ក្អក ។

ក្រុមគ្រូពេទ្យ នៅអាមេរិក និង កាណាដា បានឱ្យអ្នកជំងឺ ទទួលទាននំប៉័ង លាបទឹកឃ្មុំ រៀងរាល់ថ្ងៃ ដើម្បីជួយកាត់បន្ថយ កូឡេស្តេរ៉ូល ការពាររោគបេះដូង ធ្វើឱ្យបេះដូង លោតបានជាធម្មតា ។

ក្នុងក្បួនតម្រា របស់ថៃ ទឹកឃ្មុំជួយឱ្យ រាងកាយបឺតស្រូប យកជាតិថ្នាំបានលឿន ជំរុញដំណើរការ របស់តម្រងនោម ជួយឱ្យឈាមរត់ ទៅចិញ្ចឹមគ្រប់ផ្នែករបស់រាងកាយ ធ្វើឱ្យមានកម្លាំងកំហែង ។ ចំពោះបុរស ដែលមានអាការខ្សោយ សមត្ថភាពផ្លូវភេទ បើបានទទួលទាន ទឹកឃ្មុំសុទ្ធ មួយថ្ងៃ ២ ស្លាបព្រាបាយ មុនចូលដំណេក រៀងរាល់ថ្ងៃនោះ អាការនឹងបាន ប្រសើរឡើង ។

បើបានផឹកទឹកឃ្មុំសុទ្ធ ឆុងជាមួយទឹកក្តៅឧណ្ហៗ មុនទទួលទានអាហារ មួយម៉ោងកន្លះ នោះវានឹងជួយទប់ស្កាត់ មិនឱ្យក្រពះបញ្ចោញ អាស៊ីដចេញមកច្រើនពេក សមសម្រាប់អ្នកដែល កើតដំបៅក្រពះ ប៉ុន្តែបើឆុងជាមួយ ទឹកត្រជាក់ វានឹងជំរុញឱ្យ ក្រពះអាហារ បញ្ចោញអាស៊ីដ កាន់តែច្រើន ជំរុញការគាបច្របាច់ របស់ពោះវៀន បំបាត់បញ្ហា អាហារមិនរលាយ និងទល់លាមក ។

មិនត្រូវផឹកទឹកឃ្មុំ ក្រោយពីអាហារ រួចភ្លាមៗទេ ពីព្រោះកម្រិតជាតិស្ករ ក្នុងឈាមនឹងកើនឡើង យ៉ាងរហ័ស ហើយជំរុញឱ្យក្រពះបញ្ចោញ អាស៊ីដច្រើនជ្រុល បើចង់ផឹក ត្រូវទទួលទាន អាហារប្រមាណជា ២-៣ ម៉ោងសិន ។

ចំពោះស្ត្រីដែលពិបាក ទទួលទានដំណេក បើបានផឹកទឹកឃ្មុំឆុង ជាមួយទឹកធម្មតា មុនចូលដំណេក ប្រមាណជា ១ កែវ នឹងជួយឱ្យទទួលទាន ដំណេកលក់ស្រួល ៕