អត្ថប្រយោជន៍នៃការហាត់ប្រាណ

បញ្ហាសុខភាព​ គឺជាកត្តាសំខាន់បំផុតសំរាប់ជីវិតមនុស្សមា្នក់ៗ ទន្ទឹមនឹងនេះដែរ ការហាត់ប្រាណ​ដែលត្រូវបានចាត់ទុកថាជាឪសថ​មួយដ៏មាន​ប្រសិទ្ធភាពសំរាប់ជួយធ្វើអោយសុខភាពល្អនោះ បាននឹងកំពុងយកចិត្តទុកដាក់យ៉ាងខ្លាំងពីសំណាក់ប្រជាជនទូទៅផងដែរ ។

ជាការពិតប្រសិន​បើគេធ្វើដំណើរឆ្លងកាត់តាមផ្លូវក្បែរបណ្តាសួនច្បារសំខាន់ៗនានា រឺតាមផ្លូវពហុកីឡាឋានជាតិអូឡាំពិច មិនថាពេលព្រឹក ឬ ពេលល្ងាច​ នោះគេប្រាកដជាអាចលឺនូវសម្លេងមនុស្ស​ម្នាយ៉ាង​ច្រើនកំពុងហាត់ប្រាណស្ទើរឥតដាច់ឡើយ ។

ជាមួយសំលៀកបំពាក់កីឡា និងទឹកមុខញញឹម លោកអ៊ុំ ម៉ៅ សំណាង បានអោយដឹងថា ​“ខ្ញុំ តែងតែមកហាត់ប្រាណជារៀងរាល់ថ្ងៃ ដោយ​សារតែចង់បានសុខភាពល្អ” ។​​ គាត់បានបន្តទៀតថា​ “ការហាត់ប្រាណអាចជួយអោយខ្ញុំជា​ និងការពារនូវជំងឺជាច្រើនមុខទៀតផង” ។

ជាមួយសម្លេងសប្បាយរីករាយ​ យុវជន​ពីរនាក់​ គឺ​ សុភក្តិ និង វ៉ាសី​ ក៏មិនខុសគ្នា អ្វីនឹងលោក អ៊ុំ សំណាង ដែរនោះ​ បាននិយាយថា “ការ​ ហាត់​ប្រាណមិនត្រឹមតែអាចជួយអោយ​មាន​​សុខភាពល្អប៉ុណ្ណោះទេ តែវាអាចជួយអោយពួកខ្ញុំបំបាត់នូវភាពស្មុគស្មាញក្រោយពីការរៀនសូត្រ និង​ អាច​អោយមានអារម្មណ៏ភ្លីថ្លារទៀតផង”​ ។

ស្របពេលនោះដែរ លោកពូ សៅ​ សារិន មានសំបុរខ្មៅស្រអែម រាងកាយមាំមួន ដែលកំពុង​ធ្វើចលនា​តាមចង្វាក់រាំនោះ ក៏បានចំនាយ​ពេលរបស់គាត់​បញ្ជាក់ដែរថា “ខ្ញុំបានចាប់ផ្តើមការហាត់ប្រាណ គឺ នៅក្រោយពេលដែលទទួលបានការណែនាំពីសំនាក់គ្រូពេទ្យដែលថា ការហាត់​ប្រាណជាប្រចាំ​​​​​​​​​​​​​​​​​អាចជួយអោយសុខភាពល្អ និងអាចជួយអោយ​កាត់បន្ថយអត្រាគ្រោះថ្នាក់របស់ជំងឺទឹកនោមផ្អែម ដែលជាជំងឺចាស់របស់ខ្ញុំ ទៀតផង” ។

ចំនែកឯ យុវសិស្សបីនាក់ទៀត​​ គឺ គឹម លី រី​ ណា និង​ តាន់ តេ ដែលកំពុងអង្គុយជជែកលេងពីការសិក្សារបស់ពួនគេ​ ក៏បានបន្ថែម​ទៀត​ដែរ​​ថា​ “ការហាត់ប្រាណជាប្រចាំអាចជួយអោយមានអារម្មណ៍ស្រស់ស្រាយ និងបាត់អស់នូវការនឿយហត់ ការតប់ប្រមល់ផ្សេងៗក្រោយពីការ​សិក្សា​ដ៏យ៉ូរមក” ។​ ក្នុងនោះ គឹម លី បាន​លើកឡើងថា “ការហាត់ប្រាណបានជួយអោយខ្ញុំមានអារម្មណ៍ថាមានការវាងវៃ និង រហ័សរហួន​ ក្នុងការ សិក្សាផងដែរ” ។

ភារម្យ ដែលត្រូវបានគេចាត់ទុកថាជាគ្រូបង្រៀនរាំ​​ (ចលនាហាត់ប្រាណ) បានចូលរួមជាយោបល់ដែរថា “មានមនុស្សកាន់តែច្រើនឡើងៗ មកធ្វើការហាត់ប្រាណជាមួយខ្ញុំ ហើយម្នាក់ៗតែងតែនិយាយសសើរមិនដែលខាន ពីអត្ថប្រយោជន៍នានាដែលទទួលបានក្រោយពីការ​ហាត់ប្រាណ​”​

កំពុងអង្គុយដោយស្ងប់ស្ងាត់តែម្នាក់ឯង យុន បានចូលរួម​ ជាគំនិតថា “ការហាត់ប្រាណមានសារសំខាន់ណាស់” ។​ “ខ្ញុំតែងមកហាត់ប្រាណ​ជាប្រចាំនាពេលល្ងាច ដោយខ្ញុំចង់បាននូវសុខភាពល្អ” ។​ ជាមួយនិងគ្នានេះដែរ យុនបន្តថា “ការហាត់ប្រាណបានផ្តល់អោយខ្ញុំមិនត្រឹមតែសុខភាព ប៉ុណ្ណោះទេ ការហាត់ប្រាណក៏បានផ្តល់អោយខ្ញុំនូវមិត្តភាព សាមគ្គីភាព ដ៏ល្អទៀតផង​ ជាជាងការចំនាយពេលវេលាទំនេរ ឥតប្រយោជន៍ ប្រព្រឹត្តិ​អំពើមិនល្អ” ។

ចំនែក លោកវេជ្ជបណ្ឌិត ស៊ុយ សុវណ្ណារ៉ា មកពីមន្ទីរពេទ្យកាឡូម៉ែត្រមានប្រសាសន៍ដែរថា “ការហាត់ប្រាណពិតមានសារសំខាន់ណាស់ ជាពិសេសសំរាប់សុខភាព ដោយហេតុថាការហាត់ប្រាណជាប្រចាំក្នុងមួយថ្ងៃអោយបាន​​ ១៥ នាទី ហើយយ៉ាងតិច ៣ ដងក្នុងមួយ​សប្តាហ៍ ជួយ​អោយ​​យើងកាត់បន្ថយជំងឺផ្សេងៗដែលទាក់ទងជាមួយសសៃឈាម និងបេះដូង ពីព្រោះវាបានជួយកាត់បន្ថយកំនកជាតិខ្លាញ់នៅក្នុងឈាម និង ជាតិលីពីតដែលជាសារធាតុអាក្រក់ចេញពីរាង្គកាយរបស់យើង” ។

លោកវេជ្ជបណ្ឌិតបានបន្ថែមថា “អត្ថប្រយោជន៍សំខាន់មួយទៀតរបស់ការហាត់ប្រាណ គឺជួយយើ កំចាត់ចោលនូវជំងឺ Stress” ។ “ទន្ទឹមនឹងការរីកចំរើននៃសេដ្ឋកិច្ចនោះ Stress បានកើតឡើងកាន់តែច្រើន​​​ៗ ដូច្នោះហើយការហាត់ប្រាណជាសកម្មភាពមួយដ៏មានប្រសិទ្ធភាព​ដោយជួយព្យាបាលជំងឺនេះ និងធ្វើអោយមានអារម្មណ៍ស្រស់ថ្លាទៀតផង” គាត់បន្ថែម ។

by Suyheimkhemra